Штодня ўвосень людзі паведамляюць пра непрытомных птушак пад будынкамі і аўтобуснымі прыпынкамі. Што адбываецца і як дапамагчы птушкам?
Птушкі і шыбы. Ілюстрацыйнае фота
Ідзе восеньская міграцыя, і падчас яе птушкі часта сутыкаюцца з празрыстымі і люстранымі паверхнямі будынкаў, – тлумачыць арнітолаг Сямён Левы. – У прыродзе няма нічога смяротнага, аналагічнага шыбам, таму птушкі не вучацца і надалей гінуць пры сутыкненнях.
Птушкі могуць убачыць расліны праз скразныя вокны ці адбітак зеляніну ў шыбе і паляцець наўмысна туды.
Прыпынак у Мінску. Празрыстыя сценкі небяспечныя для птушак. Фота Алесі Башарымавай
Таму будынкі з вялікімі вокнамі з суцэльнага шкла, шкляныя хмарачосы, аўтобусныя прыпынкі са шклянымі сценамі асабліва небяспечныя для птушак. Але ўвогуле для птушак патэнцыйна небяспечнае ўсё, што мае празрыстае шкло, у тым ліку вокны вашага дома.
Як зрабіць вокны бяспечнымі для птушак?
Для гэтага трэба зрабіць іх заўважнымі.
У некаторых краінах вытворцы прапануюць людзям гатовыя рашэнні: дэкаратыўная празрыстая плёнка з малюнкам або арнаментам, які адбівае УФ-прамяні, якія птушкі добра бачаць; клейкая стужка, якая лепіцца на шкло і адклейваецца, пакідаючы на шыбе шэраг белых кропак.
Налепкі для птушынай бяспекі. Фота featherfriendly.com
Але можна і самастойна зрабіць сваё акно бяспечным.
Вось асноўныя прынцыпы, як наносіць на шыбу разметку.
- Зазоры разметкі павінны быць не большыя за 10 см, у ідэале – 5 см, інакш птушка можа паспрабаваць праляцець праз іх і ўсё роўна ўдарыцца у акно.
- Маркіроўку трэба наносіць на вонкавую паверхню шкла, а НЕ на ўнутраную. Любая маркіроўка з унутранага боку становіцца нябачнай праз адлюстраванне навакольнага асяроддзя (дрэваў або неба).
- Разметка павінна быць вельмі кантраснай – варта, каб яна вылучалася на акне. Птушкі могуць проста не заўважыць некантрасную маркіроўку, напрыклад, чорныя кропкі на цёмным акне.
- Кожная метка павінна мець дыяметр не менш за 6 мм.
- Разметка павінна ахопліваць усю паверхню шкла.
Малады малы дзяцел, які сутыкнуўся з шыбай. Праз некалькі хвілін ён ачомаўся і паляцеў. Фота Аксаны Казаковай, t.me/ptushkafota
Якія варыянты разметкі можна зрабіць?
- Павесіць звонку вертыкальна стужкі, вяроўкі або шнуры на адлегласці 5-10 см адзін ад аднаго. Пачытай, як самастойна зрабіць так званыя ахоўныя фіранкі Акапяна з парашутнага шнура – яны вельмі эфектыўныя.
- Прыклеіць звонку на акно непразрыстыя белыя палоскі ці кропкі з адлегласцю 5-10 см паміж імі.
- Абклеіць вонкавы бок шыбаў яркімі налепкамі. Форма налепак няважная, галоўнае пакрыць імі ўсю паверхню і прытрымлівацца адлегласці 5-10 см паміж налепкамі.
Дадаткова можна замаляваць усё акно звонку дзіцячымі фламастарамі з ультрафіялетавым чарнілам. Шыба застанецца празрыстай, але стане заўважнай для птушак, бо яны добра бачаць ультрафіялетавае святло.
У якасці часовых рашэнняў можна размаляваць шыбы звонку тэмпернай фарбай або кавалачкам мыла. Мыльны ўзор трэба будзе рэгулярна паднаўляць. Пры патрэбе малюнак пазней можна будзе змыць.
Помні, стары метад з наклейкай сілуэтаў драпежных птушак на шыбы не працуе, калі яны не наклеены праз кожныя 10 см.
Як дапамагчы птушцы, якая сутыкнулася з шыбай?
Верабей, які сутыкнуўся з шыбай
Знайшоўшы пад будынкам або прыпынкам аглушаную птушку, пасадзі яе ў цёмную скрынку і пакінь на гадзіну ў спакоі. Не трэба яе паіць ці карміць. Калі яна ачуняе, выпусці яе на волю.
Паводле flap.org
Пераклад Марыі Дзянісавай
