21 кастрычніка віцяблянка Паліна Дубовая звярнула ўвагу на птушку каля гандлёвага цэнтра. Аказалася, што гэта белаваллёвы дрозд (Turdus torquatus, белозобый дрозд) – від, які раней не адзначаўся ў нашай краіне. На жаль, птушка разбілася аб шкляны будынак.
Белаваллёвыя дразды гняздуюцца ў горных раёнах Скандынавіі, а на поўдзень на зімоўку штогод мігруюць праз Беларусь. Так думалі арнітолагі, і гэтая знаходка пацвердзіла гіпотэзу.
Белаваллёвы дрозд. Фота Паліны Дубовай
Знешне белаваллёвы дрозд вельмі падобны на звычайнага ў нас чорнага дразда. Калі ярка-чорны самец добра адрозніваецца ад чорнага белай плямай на грудзях, то маладыя птушкі і самкі ад самак і маладых чорнага амаль не адрозніваюцца. Асабліва цяжка іх адрозніць у полі. Гэта будзе 344 від у беларускім спісе птушак.
Тыдзень таму ў Бельгіі вельмі рэдкая ў Еўропе каральковая пячураўка разбілася аб шыбу будынка. Толькі ў Беларусі падчас міграцыі аб шыбы забіваюцца сотні тысяч птушак штогод. Сярод іх ёсць і рэдкія і новыя для краіны віды. Для іх абароны нічога не робіцца ні дзяржавай, ні архітэктарамі, каля некаторых рабочых будынкаў дворнікі амаль штодзень змятаюць мёртвых птушак з асфальту ў сметнік.
Перш-наперш трэба засцерагчы птушак ад гібелі, а па-другое, прыглядацца і да мёртвых птушак (дзіўны выгляд, кольцы), каб ніякая каштоўная інфармацыя не прапала для навукі.
Дзяліся сваімі назіраннямі ў Тэлеграм-чаце «Ціў-ціў».
Фота Паліны Дубовай.
Wilderness
Вітаю!